25

mar / 2021

Bidasoa bizirik egoera berrira egokitzen da turismo-sektoreari laguntza emateko

  • Bi publizitate-iragarki egin dira sare sozialen bidez zabaltzeko.
  • Gainera, hainbat ekintza egingo dira on line hedabideetan, eta sare sozialetako presentzia indartuko da.

Irunen, 2021eko martxoak 24.- Irun eta Hondarribiko Udalak, Bidasoa bizirik-en bitartez, turismoaren sektoreari laguntzeko egoera berrira egokitu dira. Horretarako, Dinamizazio-plan bat egin dute, sektoreari laster aurkeztuko zaiona. Horrez gain, hainbat ekimen garatu dituzte, besteak beste, bideoak, sare sozialetan ekintzak egitea on line presentzia areagotzeko eta on line atarietan espazioak kontratatzea.

Promozio bideoak

Alde batetik, bi publizitate-bideo egin dira dira, eta horietan “nabarmendu egiten da Hondarribia eta Irun natura turismorako eta turismo gastronomikorako leku aproposak direla, eta, jakina, egungo egoerara egokituta daudela, segurtasun-neurri guztiak betez” esan du Miguel Ángel Páez Bidasoa bizirik-eko lehendakariak.

Bi hirietako irudiak erakusten dituzten bi bideo dira, sare sozialetan promozio ekintzen bidez zabalduko direnak, eta Maria Serranok, Bidasoa bizirik-eko lehendakariordeak, adierazi duenez, “Estatuko nahiz Frantziako turistak erakarri nahi dira bideo horiekin, etorri ahal direnerako”.

Bestalde, eskualdeko esperientzia enogastronomikoei buruzko bideo berriak egin dira. Hain zuzen ere, bisitariek eta tokiko biztanleek hemendik Aurrera egin ahal izango dituzten lau esperientzia berrei buruzko bideoak, www.bidasoaturismo.com helbidean ikus daitezkeenak. “Gure gastronomía dastatzeko modu desberdina eta bakarrak dira esperientzia hauek, bertako produktuaz gozatzeko eta eskualdeko gastronomiako ekoizleak, sukaldariak eta profesionalak ezagutzeko”, gaineratu du Páezek.

Gainera, esperientzia guztiak biltzen dituen bideoa bireditatu da bitan banatzeko, bat herri bakoitzeko. “Horrela, erabiltzaileak modu argiago eta errazagoan jakin ahal izango du zer egin dezakeen hiri bakoitzean” esan du María Serranok.

Azkenik, bi minutuko bideo bat egin da Irungo eta Hondarribiko 14 itsas jardueretako enpresa bakoitzarentzat, haien zerbitzuei buruzko informazioa zabaltzen laguntzeko. Halaber, enpresa guztiak agertzen diren 45 segundoko bideo orokor bat sortu da.

Bideo horiek guztiak sare sozialen eta on line sustapen kanpainen bidez zabalduko dira.

Sustapen-ekintzak

Egoera aldatu egin dela kontuan hartuta, Bidasoa bizirik-ek hainbat sustapen-ekintza jarri ditu martxan online atarietan. Era berean, hurrengo hilabeteetan sare sozialetan ekimen ezberdinak abiaratuko dira, baita ‘influencer’-ekin ekimenak,  Nazioko eta Frantziako jendeari eskualdea ezagutarazteko eta gure ingurua balioan jartzeko.

Hasteko, Bidasoa eskualdea Espainiako Trenbideen Fundazioak abian jarri berri duen Bide Berdeen Gida berrian agertuko da.

Bestalde, banner-ak jarriko dira Guide Pays Basque web gunean (www.guide-du-paysbasque.com). Banner hori turismo-bulegoen errubriketan sartuko da, Irun eta Hondarribiko turismo-webgunerako estekekin (www.bidasoaturismo.com), ‘Hondarribia Irun Turismo’ sare sozialak aipatuz eta harremanetarako helbide elektronikoa eta egoera-planoa ipiniz.

Irun eta Hondarribia lurraldeko autobusetan egongo dira ere hilabete batez, Donostialdeko 324 autobusen erabiltzaileek eskualdeko iragarkiak ikusi ahal izango baitituzte bertako telebistetan.

Kanpaina hedabideetan

Bestalde, publizitate-kanpainak egingo dira gure sektore turistikoaren egungo xede-publikoan zein eragin handiko eremuetan eragina duten hedabideetan, bai orokorrak, baita espezializatuak ere.

Bestalde, goi denboraldia hasi aurretik, Donostia Turismoko informatzaileek eskualdea bisitatuko dute bi hiriak Gipuzkoako hiriburura bisitatzen dituztenen artean ezagutarazteko.

Aipatzekoa da apirilean ekoiztetxe batek Donejakue Bidea astoan egitearen inguruko dokumental bat grabatuko duela.

Turismoko giden edizioa

Irunen eta Hondarribian turismoari buruzko gida nagusiak berrargitaratu eta paperean argitaratu dira. Zehazki, ostatu-gida berriaren 11.000 ale lau hizkuntzatan; ‘Non jan’ gida berriaren 50.000 ale, lau hizkuntzatan, eta ‘Hondarribia eta Irun turismoa’ gidaren 25.000 ale, euskaraz eta gaztelaniaz, eta beste 10.000, frantsesez eta ingelesez. Gainera, Irun eta Hondarribiko 60.000 plano eguneratu eta inprimatu dira.

Azkenik, azpimarratu behar da Irungo turismo-bulegoa hobetzeko toldo bat jarri dela, Irungo turismoaren inguruko bideo bat egin dela eta kaltetuta zeuden Irugurutzetako App-eko panelak konpondu direla.

“Turismoaren sektorea da zigortuenetako bat, bizi dugun egoeraren ondorioz, eta horregatik lagundu nahi diegu inoiz baino gehiago. Eta, oraingoz, bisitariak Euskaditik soilik etorri ahal izango diren arren, badakigu Irunek eta Hondarribiak soberako potentziala dutela bisitari horiek buruan izan ditzaketen destinoen artean erakargarri izateko, eta ekintza hauek hori erakusteko dira”, esan du Miguel Ángel Páez Bidasoa bizirik-eko lehendakariak.

Bestalde, agentziako lehendakariorde den María Serranok nabarmendu duenez, “egiten ari garen sustapen-ekintza guztiek oso kontuan dituzte indarrean dauden murrizketak, bai mugikortasunari dagokionez, bai Covid-19aren hedapena geldiarazteko guztiok errespetatu behar ditugun gainerako neurriei dagokienez”.

Sarrera hau Turismo kategorietan argitaratu da eta etiketarekin. Gorde permalinka.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude