16 Jun Innobideak-Kudeabide Programari dagozkion 2015eko deialdiko diru laguntzak.
Aurkeztuko diren proiektuak Hasierako Kontraste Txostenean zehaztutako hobekuntza arloetara bideratu behar dira, txostenean bertan adierazitako gomendioei erantzunez. Ez dira diruz lagunduko Kontraste Txostenean oinarri ez duten proiektuak. Lehen adierazi denez, nahitaezkoa da eskaerarekin batera Kontraste Txostena aurkeztea.
Oinarri arautzaile hauen ondorioetarako, Kudeaketa Aurreratuaren Hasierako Kontraste Txostena da Euskalitek egindako txosten bat non jasotzen baita enpresaren posizionamendua Kudeaketa Aurreratuaren arloan, erreferentzia gisa hartuta zehaztutako eredu berria. Kontraste Txosten horretan ere zehazten dira enpresak hobetu beharreko arloak eta ezartzen dira enpresak bete behar dituen jarraibideak KUDEABIDE programan jarraitzeko, proiektu pilotu bat (2A) nahiz finkatze proiektu bat (2B) eskatuz. Txostenak bi urteko indarraldia izango du, egiten denetik aurrera.
Proiektuak bideratu beharko dira ondorengo eremuetakoren bat gutxienez hobetzera:
— Estrategia; beharrezkoa den informazio estrategikoa eskuratzeko eta partaidetzako hausnarketa prozesuak egiteko proiektuak izango dira, eta horien bidez estrategia bat ezarri ahal izango da, gero behar bezala zabaldu eta komunikatuko dena, eta estrategia horren zerbitzura kudeatuko dira baliabide ekonomiko finantzarioak, teknologia eta informazioa.
— Bezeroak; bezeroekiko harremanak eta Balio Katearen elementu guztien (produktuen eta zerbitzuen garapena, merkaturatzea, ekoizpena, banaketa eta mantenimendua) eraginkortasuna sustatuko duten proiektuak izango dira, eta enpresaren estrategian zeregin aipagarria bete dezaketen entitate hornitzaileen eta azpikontratisten laguntza izan dezakete.
— Pertsonak; hautapen prozesuak, ordainketa sistema, eta jakintzaren, eskumenen eta lidergo gaitasunaren garapena hobetuko duten proiektuak izango dira, enpresaren estrategiarekin bat eginda.
— Gizartea; enpresak bere ahalmenekin bat datozen gizarte zereginak betetzeko eta, aldi berean, ingurumen iraunkortasuna lortzeko neurriak sustatzeko proiektuak izango dira.
— Berrikuntza; atal honetan sartuko diren proiektuen xede izango dira, lehenengo, berrikuntzak egiteko helburuak eta estrategia zehaztea, bigarren, pertsonek arriskuak har ditzaten, ekintzaile izan daitezen eta berrikuntzak egin ditzaten lortzeko beharrezkoa den barruko testuingurua sortzea eta, hirugarren, ingurunearen ahalmen berritzailea aprobetxatzea, berrikuntzako ideiak eta proiektuak eraginkortasunez eta eragimenez kudeatuz.
— Emaitzak; bezeroen, pertsonen, gizartearen eta berrikuntzaren arloan lortutako emaitza estrategikoak neurtu, ebaluatu eta kontrolatzeko mekanismoak sortzeko aukera emango duten proiektuak izango dira.
Ez dago iruzkinik