Irungo 12 enpresa industrialek parte hartu dute Bidasoa bizirik-ek antolatutako Datua kudeatzeko ikastaroaren bigarren edizioan

• Helburua datuak ateratzeko tresnak erabiltzen ikastea eta horiek kudeatzen eta interpretatzen jakitea da.
•  Guztira 15 orduko iraupena izan du, eta Mondragon Unibertsitateko Business Data Analytics graduko irakasleek eman dute.

Irungo Udalak, Bidasoa biziriken bitartez, “Datuaren Kudeaketa Enpresan” ikastaroaren bigarren edizioa antolatu du eskualdeko industriari zuzenduta. Ikastaro hau Irun Ekintzan Ekonomiaren Garapen eta Enplegu Itunak sustatzen dituen ekintzen barruan kokatzen da.

“Lehenengo edizioaren arrakastaren eta bertaratuen poztasunaren ondoren, bigarren edizioa martxan jartzea erabaki zen” adierazi du Miguel Ángel Páez Bidasoa bizirikeko presidenteak. Halaber, gaineratu duenez, “Garapen Agentzian eskualdeko industria-enpresekin harreman zuzena dugu, eta bilera eta topaketa horien ondorioz, enpresa horiek zenbait gairi buruzko prestakuntza lortzeko beharra eta nahia antzeman zen, besteak beste, datuen kudeaketari buruzkoa. Eta, hain zuzen ere, hortik sortu zen ikastaro hau emateko ideia “.

Ikastaroa Mondragon Unibertsitateko Business Data Analytics Graduko irakasleek eman dute, eta, bertan, parte-hartzaileei beren enpresak sortzen dituen datuen erauzketari eta kudeaketari buruzko ezagutzak handitzen lagundu dieten edukiak landu dituzte, ezar daitezkeen proiektuak identifikatu eta negozioen errentagarritasuna hobetzeko. Gainera, Power BI eta Knime bezalako tresnekin lan egin dute.

Ikastaroa zati praktiko eta teoriko batez osatu da. Gainera, berrikuntza gisa, edizio honetan saio bat sartu da enpresa parte-hartzaileetan, erabilera-kasu desberdinak identifikatzeko, prestakuntza praktikoagoa izan zedin. “Oso aukera ona da enpresentzat, datu zehatzak ateratzen jakiteak, interpretatzen jakiteak eta, ondoren, beren proiektuetan aplikatzeak bakoitzaren errentagarritasuna eta eraginkortasuna hobetzen laguntzen baitie. Gainera, beste errealitate batzuk ezagutu, esperientziak partekatu eta eskualdeko beste enpresa batzuekin networkinga egin ahal izan dute “, nabarmendu du Paezek.

Prestakuntza urtarrilaren 24an hasi zen Bidasoa Gunean, eta 15 orduko iraupena izan du. Guztira 5 saio izan dira, eta horietan alderdi teorikoa eta praktikoa landu dute, datifikazioari buruzko eztabaidari ere tarte bat eskainiz.

Hiriko 12 enpresak hartu dute parte: Iruma diseinu eta proiektu industrialak, Pulimentos metálicos Txingudi, Fepako Protección, Industrias Onyarbi, Forest Pioneer, Alon automotive, Sacytrans, Zubelzu, Mecanizados Josmil, Indart 3D, IP 21 Proiektuen ingeniaritza eta Poliester Gabiria.