11 Apr k-Biziak – Alokairua proiektuaren diru-laguntzen oinarri arautzaileak
Merkataritza jarduera poliki-poliki hirigunearen inguruneko ardatz berrietara mugitzen joan da, azken urteotan, eta ondorioz, hiriko beste tokietan merkataritza eta zerbitzu eskaintza gutxitzen joan da. Horrelako egoerak gehiago nabaritzen dira hirigunetik urrun dauden auzoetan.
Horregatik, merkataritza giroa onera etortzeko eta ingurune horiek berriz dinamizatzeko helburuari begira indar komertziala galdu duten guneetan merkataritza eta zerbitzu establezimendu berriak koka daitezen lagunduz, eta Irungo hainbat auzotan hurbiltasun-merkataritza deitzen dena bultzatzeko xedearekin, birdefinitzen da K-Biziak Proiektua, merkataritza jarduerak kokatzeko laguntzak ematen dituena, orain proiektuan hiriko ardatz nagusietatik kanpo dauden hainbat gune ere sartuz.
1. Deialdiaren helburua.
Deialdi honen xedea da hiriko hainbat esparruetan lokalak alokatzeko diru-laguntzak emateko erregimena arautzea.
2. Onuradunak eta eskakizunak.
Laguntza hauen onuradunak izan ahal dira ondorengo baldintzak betetzen dituzten pertsona fisiko edo juridikoak eta ondasunen erkidegoak:
A. Ezarri berria den jarduera ekonomiko baten titularra izatea.
B. Jarduera ekonomiko horren ezarpenak irekitze berri bat ekarri behar du establezimenduan, hau da, ez da bertan lehen gauzatzen zen aktibitatearen jarraipena (partziala edo osoa) izango. Salbuespenez, aktibitatearen jarraipena onargarria izango da aurreko jabeak erretretagatik edo ezintasunagatik (osoa nahiz erabatekoa) jarduera uzten badu.
C. Establezimendua irekitzeko, ez dadila lekuz aldatu udalerriko beste lekuren batean jadanik finkatutako jarduera bat.
Baldintza hau laguntza hauek jasotzen diren bitartean bete beharko da. Hala egingo ez balitz, laguntza automatikoki kenduko litzateke.
Ez da toki-aldaketatzat hartuko aktibitatea Bidasoa biziriken Enpresa Mintegian edo bide publikotik sarrera zuzena ez duen etxebizitza batean gauzatzen duten establezimenduen irekiera.
D. Bide publikotik sarrera zuzena duen eta zeinean jarduera ekonomikoa gauzatuko den lokal batean gaineko errentamendu kontratu baten titularrak izatea.
E. Eskaera egiteko momentuan, jarduera hasi denetik sei hilabete baino gehiago igaro ez izana. Epea kontatzen hasteko, Jarduera Ekonomikoen gaineko Zergan alta eman zeneko data hartuko da kontuan. Data hau diru-laguntzaren xede den helbidearena izango da.
F. «Aktibitatearen aurretiko komunikazioa» edo, hala dagokionean, «Aktibitate lizentzia» Udal honetan izapidetuta eduki beharko dute.
G. Enpresak bere sarrera nagusia edota aurrealdea deialdian jasotako kaleetakoren batean izan beharko du:
H. Lokalaren alokairu-kostuak (BEZ gabe) ez dezala gainditu deialdian ezarritako metro karratuko prezioa.
I. Enpresa edo establezimendu berriaren Negozio-Planak aldeko txostena jaso beharko du Bidasoa biziriken aldetik. Bideragarritasun planean argi adieraziko da negozioarekin jarraitzeko borondatea dagoela.
J. Pertsona bera ezin da aldi berean izan lokalaren jabe- errentatzaile eta sustatzaile-errentari, ezta sozietate erako partaidetzaren bitartez ere.
K. Onuradunak ez du ahaidetasun-loturarik izan behar, ez lokalaren jabearekin, ez haren ezkontidearekin, ondorengoekin eta jabearekin bigarren mailarainoko odolkidetasunezko edo ezkontza-ahaidetasunezko ahaidetasun-lotura duten gainerako ahaideekin ere.
3. Laguntza emateko prozedura.
Diru-laguntzak emango dira lehia prozeduraz eta banakako ebaluazioaz.
4. Emate irizpideak.
Aurkeztutako eskaerak aztertu eta balioesteko, Balioespen Batzordea eratuko da. Dagokion deialdiak zehaztuko du bere osaketa.
Aurkeztutako proiektuek gutxienez 50 puntu lortu behar dituzte Balorazio Batzordean ondoko irizpideen arabera:
a. Jarduera deialdian lehentasunezko eremu bezala zehaztutakoetara egokitzea. Gehienez 30 puntu.
b. Jarduketa-inguruneko mix komertziala hobetzeko egindako ekarpena. Gehienez 30 puntu.
c. Ingurunearen garapenari egindako ekarpena. Gehienez 20 puntu.
d. Inbertsioaren izaera berritzailea. Gehienez 10 puntu.
e. Enplegua sortzea. Gehienez 10 puntu.
5. Diru-laguntzaren zenbatekoa.
Jarduera gauzatzen den lokalaren errentaren lehendabiziko hogeita lau hilabeteak ordaintzen laguntzeko izango da diru-laguntza; inola ere ez da diruz lagunduko Jarduera Ekonomikoaren gaineko Zergan (JEZ) alta eman aurretik egindako inolako gasturik. Diru-laguntza honela emango da:
— Lehengo 12 hilabeteetan, alokairu kostuaren % 50a (BEZ kanpo), deialdian ezarritako mugen barruan.
— Hurrengo 12 hilabeteetan, alokairu kostuaren % 25a (BEZ kanpo), deialdian ezarritako mugen barruan.
6. Prozeduraren instrukzioa eta ebazpena.
Laguntza emateko prozeduraren instrukzioa Hiri bultzada, Ekonomia eta Ogasuneko Bulegoko teknikoari dagokio. Emateko prozeduraren ebazpena Alkate-lehendakariari dagokio, Balorazio Batzordearen txostenaren ondoren.
7. Esku-hartzearen justifikazioa.
Lehenengo hamabi hilabeteetako azkenari dagokiona jaso eta hurrengo hilabetearen barruan, eta hurrengo hamabi hilabeteetako azkenari dagokiona jaso eta hurrengo hilabetearen barruan, onuraduna behartuta dago Udalaren aurrean ondoren zehazten diren egiaztagiriak aurkeztera:
A. Azken urteko alokairuaren ordain-agiriak.
B. Indarrean dagoen kontratuaren originala eta kopia, eskaerarekin batera aurkeztutakoak aldaketa izan badu.
C. Berariazko adierazpena, proiektu bererako enpresak bestelako laguntza eskatu edo/eta jaso izanari buruz. Baiezko kasuan, jasotako zenbatekoak eta haien jatorria zehaztu beharko da, eredu normalizatuaren arabera.
D. Berariazko erantzukizunpeko adierazpena, eredu normalizatuaren arabera diru-laguntza jaso dezakeela adierazten duena eta datuak kontsultatzeko baimena ematen duena.
Egiaztapen hauek ofizioz egiteko baimena ematen ez bazaio Irungo Udalari, inprimaki honekin batera Zerga-betebeharrak eta Gizarte Segurantzakoak egunean dituela adierazten duten ziurtagiriak aurkeztu beharko dira.
Zergei dagozkien datuen erabilerak eta lagapenak Izaera Pertsonaleko datuak babesteari buruzko 15/1999 Lege Organikoan ezarritako mugak bete beharra dauzkate.
Laguntzaren bigarren urteko ordainketak egiten hasteko justifikazio hori aurkeztu beharra dago.
Dokumentazio hori ere laguntzaren ondorengo hamabi hilabeteak amaitzen direnean aurkeztu beharko da.
8. Ordainketak eta bermeak.
Diru-laguntzaren ordainketa, justifikatzen ez den bitartean konturako ordainketatzat joko dena, zuzenean egingo zaio errentatzaileari, eskaera-orrian adierazitako banku-kontuaren zenbakian; banku-kontu hori eta –hala dagokionean– errentamendu-kontratuan adierazitakoa bat bera izango dira ezinbestean.
Diru-laguntzaren helburua kontuan izanda –horretarako aurretik onuradunarentzako ordainketa beharrak dakarren errentamendu-kontratu bat egon behar du–, ez da berme-neurririk ezartzen.
9. Bateragarritasuna.
Diru laguntza hau erakunde eta entitateek emandako beste edozein laguntzarekin batera eman ahal izango da, betiere, laguntzen kopuru osoak alokairu-kostuaren % 100 gainditzen ez duen bitartean.
10. Enpresa-onuradunen betebeharrak.
Enpresa onuradunek betebehar hauek izango dituzte:
a. Deialdiaren helburua betetzea.
b. EJZn alta emateko eskatu zenetik, jarduera gutxienez sei hilabetez funtzionamenduan izatea, kausa justifikatua denean izan ezik. Jarduera etenez gero, onuradunak hiru hilabeteko epean frogatu beharko du badagoela horretarako arrazoirik, eta EJZn baja eman duela ere bai. Justifikazioa aztertu ondoren, Udalak bidezkoa dena erabakiko du. Jarduera justifikaziorik gabe etenez gero epe hori baino lehen, onuraduna behartuta egongo da deialdi honen kargura jasotako kopuruak itzultzera.
c. Establezimenduaren aurrealdean K-Biziak Proiektua – «Hiriko Enpresa-Gunea»ren logotipoa jartzea.
d. Irungo Udalak egingo dituen egiaztapenei men egitea; horretarako, eskatzen zaion informazio eta dokumentazio guztia udalaren eskura jarri beharko du.
e. Irungo Udalak kudeaketa plana prestatuz gero, haren barruan emandako jarraibideak segitzea. Kudeaketa plan hori egiaztapen prozesuan hutsuneak agertuz gero egingo da.
f. Laguntza hauen helburu bera finantzatzeko lortutako beste laguntza, sarrera edo baliabideen berri ematea Irungo Udalari. Jakinarazpen hori jakin bezain laster egingo da.
g. Behar bezala ikuskatutako kontabilitate-liburuak, izapidetutako erregistroak eta gainerako dokumentuak izatea, onuradunari aplika dakiokeen legediak eskatutakoaren arabera. Hau dena, egiaztatzeko eta kontrolatzeko lanak behar bezala egiteko helburuarekin.
h. Diru-laguntza emateko orduan kontuan hartutako baldintzaren baten egoera aldatuz gero, Irungo Udalari horren berri ematea.
11. Oinarriak ez betetzea.
Onuradunak oinarri hauetan ezarritako edozein baldintza betetzen ez badu, laguntza lortzeko eskubidea galduko du, jasotako laguntzak itzuli beharko ditu eta berandutzako interesa eskatuko zaio. Berandutza interesa laguntzaren bidegabeko lehen ordainketa egin zen unetik aurrera kalkulatuko da.
Diru-laguntza justifikatzeko epea amaitzen denetik hura justifikatu gabe hiru hilabete igaro baldin badira, Udalak ordaindutako zenbatekoak itzultzeko prozedurari ekingo dio, eta, horretaz gain, bidezkoak diren zigorrak jar ditzake.
12. Arau-hausteak eta zehapenak.
Arau-hauste eta zehapen gaietan azaroaren 7ko Diru-laguntzetako 38/2003 Lege Orokorra aplikatuko da.
13. Publizitatea.
Azaroaren 17ko Diru-laguntzei buruzko 38/2003 Legearen 18. eta 20. artikuluek xedatzen dutena betetzeko, Udalak Diru-laguntzen Datu-Base Nazionalari jakinaraziko dio ondoko informazioa:
— diru-laguntzaren oinarri arautzaileak,
— deialdia,
— programa eta zer aurrekontu-kredituren konturakoa den, eta
— diru-laguntzaren helburua.
Era berean, deialdia ebatzi ondoren, Udalak Diru-laguntzen Datu-Base Nazionalari jakinaraziko dio ondoko informazioa:
— onuradunen zerrenda,
— emandako eta onuradunak benetan jasotako diru-laguntzen zenbatekoa, eta
— hala badagokio, itzultzeko eta/edo ezarritako zigorren ebazpenak.
14. Oinarrien eta deialdiaren interpretazioa.
Oinarri hauen eta deialdi hauen interpretazioaz sor litekeen edozein zalantza Alkatetzaren Ebazpenaren bidez ebatziko da, Balorazio Batzordeak txostena eman ondoren.
Ez dago iruzkinik