Hemen da berriro Irungo talentu berritzaileari Irun Ekintzan sariak banatzeko ekitaldia

Irungo Udalak jakinarazi du dena prest dagoela Berrikuntzarako Irun Ekintzan Sarien zazpigarren ediziorako. Datorren asteartean, hilaren 29an, egingo da Ficobako sarreran.

Miguel Ángel Páez ordezkariaren hitzetan, «aurten ere ekimen hori antolatuko dugu, eta aurreko sei edizioetan gauza bat argi geratu da: geure enpresek berritzeko eta ekiteko kapital handia dutela, eta gure arreta merezi dutela. Kultura ekintzaile hori aitortu nahi dugu, ezerezetik abiatuta merkatuan beren bidea egiten asmatu duten ideia horiek; askotan, gainera, gure hiriaren izena munduaren luze-zabalean ezagutzera ematen dute».

 Edizio berezia izango da aurtengoa. Izan ere, zazpigarren edizio honekin beste asko bezala bertan behera geratu behar izan zuen ekimen bat berreskuratu dugu. «Dena orain arte bezala badoa eta normaltasuna berreskuratzen jarraitzen badugu, hitzordu honetan aukera izango dugu, pandemiaren hilabete gogorrenak atzean utzita, elkar ikusteko eta, gauza garrantzitsua, enpresa eta autonomo ugari egin behar izan duten lana aitortzeko: ederki egokitu dira koronabirusak ekarritako erronkari, eta ez dugu ahaztu behar krisiak gogor kolpatu dituela ehun ekonomikoa eta enpresa-ekimen asko eta asko».

 Sariak banatzeaz gain, musikaz ere girotuko da ekitaldia, Chicken farmers bertako taldearen eskutik, eta emanaldi artistiko bat ere izango da.

Lau kategoria 

Iaz bezala, lau sari emango dira, kategoria hauetan:

• Berrikuntzaren Irun Ekintzan merezimenduzko saria, 20 langile baino gehiagoko Irungo enpresentzat
• Berrikuntzaren Irun Ekintzan merezimenduzko saria, 20 langile baino gutxiagoko Irungo enpresentzat 4.000 euro
• Berrikuntzaren Irun Ekintzan saria, Irungo zerbitzu-enpresentzat 4.000 euro
• Ideia berritzaile onenaren Irun Ekintzan saria  2.000 euro

Aurten ere, epaimahaikideak gaitutako pertsonak izango dira, berrikuntzaren alor guztietako esperientzia egiaztatua dutenak. Zazpigarren edizio honetarako osatu den epaimahaian ekimen honetan ohikoak diren pertsonak eta irabazleak hautatu behar dituen aditu taldea osatzeko beste profesional batzuk uztartu dira: Hauexek dira epaimahaikideak:

1. Marisa Arriola BIC GIPUZKOA Gipuzkoako Enpresa eta Berrikuntza Zentroko gerentea
2. José Miguel Ayerza ADEGI Gipuzkoako enpresarien elkarteko zuzendari nagusia
3. Luis Manero López INNOBASQUE, Berrikuntzaren Euskal Agentziako Enpresa Berrikuntzako zuzendaria
4. Pierre Odriozola CHEZ SOKOAko zuzendari nagusia
5. Álvaro de la Rica Aspiunza DEUSTOKO UNIBERTSITATEKO EKONOMIA ETA ENPRESA ZIENTZIEN FAKULTATEKO dekanoa
6. Lander Beloki MONDRAGON UNIBERTSITATEKO ENPRESA ZIENTZIEN FAKULTATEKO dekanoa
7. Ana Beraza EHUren GIPUZKOAKO CAMPUSEKO EKONOMIA ETA ENPRESA FAKULTATEKO dekanorde koordinatzailea