83 kontratazio baino gehiago 2022ko Enpleguaren Astearen bi edizioei esker

• Guztira, leku desberdinetako 76 enpresa bertaratu ziren, eta 702 lanpostu baino gehiago eskaini ziren.
• Enpleguaren Astearen hurrengo edizioa 2023ko maiatzaren 30ean izango da.

Irun eta Hondarribiko Udalak, Bidasoa biziriken bitartez, 2007tik ari dira Enpleguaren Astea antolatzen. Ekitaldi honen helburua eskualdeko enpresei pertsonen kontratazioa erraztea eta lan bilaketa aktiboan dauden pertsonei lanpostu bat aurkitzen laguntzea da.

2022an, ohi bezala, bi Enplegu Azoka egin ziren, bata maiatzean eta bestea azaroan. Guztira 76 enpresak hartu zuten parte 242 lan-eskaintzarekin, eta 702 lanpostu betetzeko eskatu dute. 43 parte-hartzaileri egindako jarraipenetatik, gutxienez 83 kontratazio egin direla egiaztatu da.

Azokaren funtzionamendua

Azoka egin aurreko asteetan, interesdunek www.bidasoa-activa.com webgunearen bidez kontsulta ditzakete lan-eskaintzak, eta Enplegu Azokaren egunean, enpresek goiz osoan zehar egiten dituzte elkarrizketak FICOBAn, aldez aurretik izena eman beharrik gabe. Beren profilen beharrak ezagutarazten dituzten erakunde eta enpresei zuzendutako gunea irekia da, eta interesa duten pertsonek beren curriculuma eskura emateko eta enpresekin elkarrizketa bat izateko aukera dute. Profil horiei buruzko informazioa Bidasoa biziriken webgunean argitaratzen da.

Miguel Ángel Páezek, Bidasoa bizirikeko presidenteak, adierazi duenez, “2022an egindako bi edizioek arrakasta handia izan dute, batetik, bertaratutako pertsonen kopuruak nabarmen egin duelako gora, eta, bestetik, beraientzat oso interesgarriak diren profilak dituzten curriculum asko jaso dituzten enpresen gogobetetasunagatik”. Eta nabarmendu duenez, “gainera, urtetik urtera gero eta enpresa gehiagok erabakitzen dute Enplegu Azoka honetara lanpostu desberdinetarako pertsonak bilatzera etortzea. Gauzak ondo egiten ari direla adierazten duen zerbait da”.

Bestalde, María Serranok, Bidasoa bizirikeko lehendakariordeak adierazi duenez, “Bidasoa bizirik lan sozial garrantzitsua egiten ari gara lanpostu bat bilatzen ari diren pertsonen eta gure eskualdeko pertsonak enplegatu nahi dituzten enpresen arteko topagune horiek bultzatzen jarraitzeko”.

Laster iritsiko da Enpleguaren Astearen XXIX. Edizioa

2023ko maiatzaren 30ean XXIX. Enpleguaren Astea ospatuko da Ficoban, urtero egiten diren bi asteetatik lehena. Bidasoa Bizirik-eko Enplegu Saila lanean ari da hurbiltzen diren pertsonek eskualdeko eta inguruko sektoreetako enpresetan lan-eskaintza zabala aurki dezaten.